NUNDUK DI GUN

Ata pat ranga tawa
One kilo penong doong
Wengko le momang de ende ema
Hanang puar uma duat de emad

Ngo ako lawa do
Ruti ratit pande lemari ema dading
Eko roton ende go te kawe woja ce tongka
Rantang toe manga hang te anakd

Toing do ise lopo
Hang dia dia rantang retang weras
Ce hetil ikang kering te kawan hang bongkar
Reguk ilur neho runing kaka ngkiong

Wulang dua dea toe manga
Teneng teko do do ende go
Nunduk toe manga putus pande rendut wua tuka koen
Kamer le tawas, toe sadar hemong hang.

Kilo hoo penong doong
Landing lanar tawa woko lonto cama
Maram saung ndaeng lebang te minakn hang bongkar
Sosok di Ma pande ngarat hang de anakn

Woko nungku cau buku
Pau wa le Ende agu ema
“Neko neho ami ende emas
Sekolah dia-dia, neko hemong mbate
Icid de meu loked dami tete tapa”

Ndurus  luu du lakon weta geong
Ngo pala tana tadang te ba tombo dia diang gula
Lahos toe cumang, landang toe moras momang
Weta go, porong ludung bali-bali kasi asi

Le dian Mori Adak, molor lakon hi lalong
Tamat hi nana, teti wain te lut Mori Sengaji
Ndurus wae luun woko legong natas bate labar
Yo Mori, jaga dia dias lite ende ema daku

Tua kole weta gisem ga
One tana data nanang ngo palan
Landing kole-kole te duat tana wa mai poco ranaka
Gentut dami naram porong berkat koe sanggen nomber koem

Hiat te pat tambah langkas haeng ntala
Kilar keta galan pande nanang sekolah tadang
Maram dumpul wuku tela toni ise ende ema
Asal hi nana  lako molorn one salang ngoeng koen
Mori, titong koe lite ase koeg

Ende Ema go, bo do gentut de anak momangs
Landing tadang hia one tana data
Ngaji cama laing te pande ngalis nai dite
Ai Morin de toe repa lelo ite ca keluarga.

my family